Home Internacional QUERELANTES ARXENTINAS CONTRA A REPRESIÓN DA DITADURA DO XENERAL FRANCO CREAN A ASOCIACIÓN POLA RECUPERACIÓN DA MEMORIA HISTÓRICA-ARXENTINA

QUERELANTES ARXENTINAS CONTRA A REPRESIÓN DA DITADURA DO XENERAL FRANCO CREAN A ASOCIACIÓN POLA RECUPERACIÓN DA MEMORIA HISTÓRICA-ARXENTINA

por Xan Leira

Nun acto cheo de emotividade e denuncia contra a impunidade dos crimes perpetrados polo golpe militar fascista do 18 de xullo de 1936 en España, presentouse na capital porteña a “Asociación por la Recuperación de la Memoria Histórica – Argentina”, co obxectivo posto na “recuperación e dignificación da memoria histórica con relación ao xenocidio cometido en España polo franquismo dende o golpe cívico-militar e a posterior Guerra Civil Española (1936-39) ata as primeiras eleccións de 1977”.

O marco elixido foi  a Casa de Nazaret dos Peregrinos Pasionistas da Parroquia Santa Cruz. O ámbito non podía ser máis significativo para acoller este acto de reclamo pola Verdade, Memoria e Xustiza. A Casa Nazaret foi durante os escuros anos da ditadura xenocida arxentina fogar solidario e protector das familias e organismos de dereitos humanos que loitaban pola aparición con vida dos detidos e desaparecidos políticos, sindicais e estudantís. Este recinto de protección e acollemento foi violentado polas forzas represoras na noite do 8 de decembro de 1977 –no medio dunha celebración relixiosa pola Inmaculada Concepción de María–, e na acción foron secuestradas e desaparecidas algunhas integrantes das Nais da Praza de Maio e outros militantes dos DDHH, nomeadamente: Esther Ballestrino de Careaga e María Eugenia Ponce de Bianco, a monxa francesa Alice Domon e Ángela Auad, Gabriel Horane, Raquel Bulit e Patricia Oviedo.

Nese mítico fogar de encontros e identidades, de verdade e xustiza, Adriana Fernández; Inés García Holgado; Nora Cortiñas das Nais de Praza de Maio-Liña Fundadora; Matías Bailone, avogado da querela e Ana María Careaga filla da Nai de Praza de Maio desaparecida no suceso anteriormente citado,  expresaron o seu compromiso para, a través da nova asociación, realizar un traballo de sensibilización social que promova a aparición de novos testemuños e o apoio xurídico e psicolóxico ás familias españolas que se acheguen á Asociación.

 

UN POUCO DE HISTORIA

“Organizacións humanitarias de Arxentina e España, xunto ao Nobel da Paz 1980 Adolfo Pérez Esquivel, presentaron o 14 de abril do ano 2010 nos tribunais de Buenos Aires unha querela para iniciar unha investigación sobre o “xenocidio” e os crimes de lesa humanidade cometidos contra miles de persoas durante a Guerra Civil e a ditadura franquista en España.

A que se coñece entre as vítimas da ditadura franquista como Querela Arxentina, centrouse fundamentalmente no caso de Darío Rivas, un nonaxenario galego que reside en Arxentina desde os anos trinta do pasado século, o seu pai, Severino, alcalde socialista da localidade lucense de Castro de Rei morreu en 1936 fusilado a mans de pistoleiros de Falanxe Española. Darío en representación da Asociación para a Recuperación da Memoria Histórica e xunto a máis familiares acudiu o 14 de abril de 2010 ao Xulgado de Buenos Aires para buscar xustiza amparado pola Constitución Arxentina.

Esta investigación abriuse en aplicación do principio de xurisdición universal e é a única aberta en todo o mundo polas graves violacións de dereitos humanos cometidas durante a Guerra Civil e o franquismo. A querela recolle os seguintes delitos: “homicidio, homicidio agravado, privación ilegal da liberdade cualificada pola aplicación de torturas e demais delitos que resulten da investigación, cometidos en España no período comprendido entre o 17 de xullo de 1936 e o 15 de xuño de 1977, data das primeiras eleccións parlamentarias libres e pluralistas desde as do 16 de febreiro de 1936″.

Son crimes de lesa humanidade e non prescriben. Desde ese contundente argumento, a xuíza arxentina, María Servini de Cubría, ditou unha orde internacional de detención contra catro torturadores da ditadura do xeneral Francisco Franco. O seu auto relata e argumenta con contundencia a actividade represiva do réxime franquista e explica someramente por que a xustiza arxentina é competente para a investigación deses crimes.

Arxentina é quizais o país que máis avanzou na persecución das violacións de dereitos humanos dunha ditadura. Tras a detención e o encarceramento de numerosos perpetradores agora inician a investigación xudicial da trama económica, algo que se ocorrese en España poñería patas para arriba boa parte da súa estrutura económica.

En todos estes anos, España nin investigou, nin colaborou coa xustiza arxentina. España ten que asumir as súas obrigacións de poñer fin á impunidade e de garantir o dereito á verdade, á xustiza e á reparación para todas as vítimas.” (Fonte http://memoriahistorica.org.es/querella-argentina).

Para rematar con este panorama de impunidade que avergoña a calquera cidadán demócrata é preciso dicir que España é o país do mundo, despois de Cambodia, con máis casos de desaparecidos do mundo. Diversos organismos internacionais como a ONU, Parlamento Europeo, Amnistía Internacional, reclaman do goberno e da xustiza española unha actitude que corrixa definitivamente esta enorme inxustiza humana, política, social e económica soportada polas vítimas e os seus familiares que, despois de máis de oitenta anos transcorridos dos feitos, atormentan ao conxunto da sociedade española.

 

UNHA HISTORIA ENTRE MILLEIROS

Adriana Fernández é unha das promotoras da Asociación para a Recuperación da Memoria Histórica e neta de Antonio Fernández González “el Cesterín”, fusilado o 9 de outubro de 1936 en Ponferrada, León. Nesa condición participa activamente da querela arxentina.

O caso de Adriana é semellante á de moitos outros netos e netas de represaliados que, sen medos nin prexuízos, protagonizan en toda España e na diáspora arxentina, como é o seu caso, un movemento cidadán pola recuperación da memoria republicana que, entre os seus obxectivos figuran: a dignificación dos valores cívicos e democráticos polos que foron represaliados; a sanción histórica, política e xurídica do réxime fascista instaurado o 18 de xullo do 36; e o descubrimento e exhumación das fosas comúns que se espallan por todo o territorio español. Aproximadamente 150.000 vítimas xacen, aínda, nas cunetas.

Adriana, como a maioría da poboación española foi, no seu caso, vítima indirecta do silencio, do medo, do terror que dominaba e aínda domina a unha grande parte da sociedade española. Así foi educada polo seu pai Constantino, quen medrou sen saber a verdadeira historia tráxica do seu pai. A historia oficial sinalaba unha pelexa como causa da súa morte, agochando, como era norma, o fusilamento por causas políticas. Dito doutro xeito, a historia oficial convertía ao seu pai nun camorrista máis, en cambio dun cidadán que loitaba polos seu dereitos cívicos, políticos e económicos. A deturpación da verdade nun medio social adverso e represivo fixo que a estigmatización, a desmemoria e posiblemente a vergoña, se instalara na súa vida e, transcorridos os anos, tamén, na vida da súa familia na Arxentina.

Mais, a neta de don Constantino, que medrou sen un relato familiar claro sobre a sorte do seu avó, comezou a preguntar, e preguntando foi tecendo no seu interior fíos e fíos que, co tempo, levarona, xunto o seu pai, ata as terras de Ponferrada, León.

O seu pai recordaba que algún que outro veciño dicía que Antonio “o Cesterín” estaba enterrado nunha leira “onde a herba medraba máis alta” e a ela chegaron. Nas entrañas da terra atoparon os restos de Don Antonio Fernández González, xornaleiro que loitou para que o traballo digno da terra dera os froitos dun mañá ventureiro para os seus.

Adriana Fernández, a neta de don Antonio é, hoxendía, quen, como os xornaleiros que diariamente procuran o pan, neste caso o pan da verdade, xunto a Inés García Holgado e Darío Rivas, enfrontan dende os xulgados a todo un sistema económico, xurídico e político que naceu dende o propio ventre podre do franquismo.

Xan Leira

0 comentário
0

RECOMENDAMOS

Comente

* Ao utilizar este formulário, você concorda com o armazenamento e gestão de seus dados por este site.